কবিতাৰ শিৰোনামঃ  জুবিন গাৰ্গ

     ___________________________

সাগৰৰ মহাবাহুত তুমি

সংগীতৰ লহৰ তুলি

অজান পৃথিৱীৰ

অতিথি হৈ

আমাৰ দুচকুত দিলা গুজি

স্মৰণীয় এখনি ছবি,

নাম কি জানানে 

নাম.... 

আমাৰ সকলোৰে

হিয়াৰ আমঠু অসম হাৰ্টথ্ৰব 

জুবিন গাৰ্গ৷

বাটৰে শেষতে

বাট চাই চাই

বাটৰ বাটৰুৱাইও

ৰৈ ৰৈ বিনালে আজি

মায়াবিনী ৰাতিৰ বুকুত

দেখা পালো তোমাৰ ছবি,

আবেলি আকাশতো

ঘৰমুৱা পক্ষীয়েও

কৈ যায় কাণে কাণে

গুণগুণ গানে গানে বুলি

জানানে কি নাম তেওঁ

নাম... 

অসম হাৰ্টথ্ৰব জুবিন গাৰ্গ৷

উজনিৰ দুজনী গাভৰুৱেও

অশ্ৰুসিক্ত নয়নেৰে

মৰম নদীৰ গাভৰু ঘাটত

উমান নাপায় আজি

হিয়া দিয়া নিয়াৰ,

বসন্তৰ ডালে ডালেও

এইবাৰ কপৌফুলে

শুৱনি নকৰে জানা

ৰাংঢালীৰ লাহতী খোপা

জানানে কাৰ বাবে

কি নাম

নাম... 

অসম হাৰ্টথ্ৰব জুবিন গাৰ্গ...!!!

কবিতাৰ শিৰোনামঃ    এক প্ৰেম কাহিনী     

.......................................................................................             

হঠাতেই হেৰাল হিয়াৰ আমঠু

উদং উদ্ং বুকু ,

সেয়ে সাগৰৰ পাৰত 

নিবিচাৰোঁ অপেক্ষাৰ সেঁতু। 

বাটৰে শেষতে বাট চাই আছোঁ 

উভতি আহিবা পাখিতেই পাখি থৈ 

চোতালত জোনাক সিঁচি

জনতাক আপোন কৰিবলৈ।

তুমিয়েই কৈছিলা 

তোমাৰ মৰুভূমিৰ তিয়াই দিবলৈ 

সুঁতি এৰি যোৱা নদী হ'বলৈ 

পিছে কেনেকৈ 

তুমিটো অকলে অকলে সাগৰক সাৱটি 

মনে মনে চকু মুদি 

গ'লাগৈ অজান দেশলৈ ।

আমাৰ চকুত চেৰাপুঞ্জী দি 

সৰগত নতুন ঘৰ সাজিলা, 

কোনোৱে কৈছে তুমি হেনো মৰিলা 

এইবোৰ কথা শুনিলে হাঁহি উঠে জানা !

দেৱতা জানো মৰে?

ভাল মানুহৰ জানো মৃত্যু হয় ?

তেওঁলোকৰ দুখ নাই 

নাজানে সিহঁতে 

তুমি অমৰ বুলি,

জুবিন দা ....

তোমাক কোনেও মৰিবলৈ নিদিয়ে ।

তুমি একবিংশ শতিকাৰ 

এক প্ৰেম কাহিনী, 

তোমাৰ মৰুভূমিৰ কেকটাছ 

এদিন ফুলিব 

অপেক্ষা মাথোঁ তুমি ঘূৰি অহালৈ 

অপেক্ষা অপেক্ষা অপেক্ষা!!!