জুবিন মানে অসম

জুবিন গাৰ্গ অসমৰ সংস্কৃতি জগতৰ এটি উজ্জ্বল নক্ষত্ৰ। তেওঁৰ কণ্ঠ, সৃষ্টিশীলতা আৰু সাহসে অসমীয়া সংগীতক কেৱল অসমৰ ভিতৰতে নহয়, সমগ্ৰ ভাৰতৰ লগতে বিশ্বৰ বুকুত এক নতুন পৰিচয় দিছিল। কিন্তু তেওঁৰ প্ৰভাৱ কেৱল সংগীতৰ ক্ষেত্ৰতেই সীমাবদ্ধ নহয়; তেওঁৰ জাতি প্ৰেম,সমাজ প্ৰেম দায়বদ্ধতা,দুখীয়া-নিচলাৰ ত্ৰাণকৰ্তা ,নৱপ্ৰজন্মৰ চিন্তা-ভাবনা আৰু আত্মবিশ্বাস।তেওঁ এজন শিল্পী, এজন চিন্তাশীল নাগৰিক, আৰু এজন যুক্তিবাদী যোদ্ধা আছিল — যি জীৱনত সংঘাতক ভয় নকৰাকৈ আগবাঢ়িছিল, আনকো আগবাঢ়িবলৈ অনুপ্ৰাণিত কৰিছিল।যাৰ ফলস্বৰূপে ভগৱান ৰূপী জুবিন গাৰ্গ প্ৰতিজন অসমীয়াৰ হৃদয়ৰ একোণত বাস কৰিছে।

আজি আমাৰ প্ৰজন্ম বিশ্বায়নৰ সৈতে সংঘাত কৰি আগবাঢ়ি আছে।একেদৰে দেশ-বিদেশৰ সংগীতত মন দিয়া সময়তো,জুবিন দাৰ গীত স্মৃতি,শব্দ আৰু সুৰে আমাক বান্ধি ৰাখিছে।যাৰ গীত শুনিলে যেন নিজৰ ঘৰ,গাওঁ আৰু শৈশৱৰ দিনবোৰ মনত পৰে।

এটাই জীৱন এজনেই জুবিন।এইহেন ব্যক্তিজনে আমাক এৰি গুচি গ'ল।এজন ভগৱানৰূপী মনুষ্য হেৰাল।অসমীয়া নৱপ্ৰজন্মটো যেন অভিভাৱক হীন হ'ল। জুবিন দা বিহীন জীৱনটো কি হ'ব সেইয়া ভাৱি মনত ভয়-শংকাই বেৰি ধৰে।তেওঁ আমাক এৰি গুচি গ'ল যদিও প্ৰতিজন অসমীয়াৰ হিয়াৰ আমঠুজন আমি সদায় জীয়াই ৰাখিম।তেওঁ বিচৰাৰ ধৰণে জাতিটোক জীয়াই ৰাখিবলৈ চেষ্টা কৰিম। যিহেতু জুবিন দা ঘৰ জাঁজীৰ তামুলীছিগাত।সদায় জাঁজীৰ ল'ৰা বুলি গৌৰৱ কৰে।আমি জাঁজীবাসী হিচাপে তেওঁক চিৰদিনৰ কাৰণে জিলিকাম।নেদেখা পৃথিৱীখনত ভালে থাকা জুবিন দা।তাৰ পৰাই আমাক সমাজ আৰু জাতিৰ প্ৰতি সেৱা আগবঢ়াবলৈ সকলোকে আশীৰ্বাদ আৰু শক্তি দি থাকা।

আমাৰ জাঁজী জুবিনৰ জাঁজী,

আমাৰ জাঁজী গৌৰৱৰ জাঁজী। 

 ✒️বুটম দত্ত।

জাঁজী-জামুগুৰি,শিৱসাগৰ

হৃদয়স্পশী জুবিন–আমাৰ গৌৰৱ,আমাৰ প্ৰাণ

অসম তথা অসমীয়াৰ হিয়াৰ আমঠু, ,জাতীয় জীৱনৰ বলিষ্ঠ কণ্ঠ,সাহস,আবেগ,অনুপ্ৰেৰণা আজন্ম শিল্পী জুবিন গাৰ্গ। ''মোৰ কোনো জাতি নাই, মোৰ কোনো ধৰ্ম নাই, মোৰ কোনো ভগৱান নাই, মই মুক্ত, ময়েই কাঞ্চনজংঘা।" অসমৰ সাংস্কৃতিক আকাশৰ এটি উজ্জ্বল নক্ষত্ৰ জুবিন গাৰ্গ। তেওঁ আছিল একাধাৰে অমৃত কণ্ঠৰ গায়ক,গীতিকাৰ, সুৰকাৰ,বাদ‍্যযন্ত্ৰী,চলচ্চিত্ৰ অভিনেতা, কবি, লেখক, দূৰ্বাৰ প্ৰকৃতিপ্ৰেমী এজন মহানায়ক। জুবিন গাৰ্গ অসমৰ গৌৰৱ,সংগীত জগতৰ সূৰ্য্য।  তেওঁৰ কণ্ঠই লক্ষ্যধিক হৃদয় জিনিছে। দেশপ্ৰেম, মানুহৰ প্ৰতি মৰম আৰু সংস্কৃতিৰ প্ৰতি ত‍্যাগে তেওঁক জাতিৰ সূৰ্য্য হিচাবে প্ৰতিষ্ঠিত কৰিছে।

     অসমৰ সংগীত জগতখনত খুউব কম দিনতে খলকনি তোলা  হৃদয়ৰ নিভৃত কোণত সাঁচি ৰখা, স্বাভিমানি অসমীয়াৰ সিৰাই- উপসিৰাই প্ৰবাহিত হৈ থকাৰ অমৃত কণ্ঠৰ অধিকাৰী আমাৰ সকলোৱে মৰমৰ আপোন মানুহ জন যাওঁ বুলিয়েই সঁচাকৈয়ে গ’লগৈ।  জাতিক ভালপোৱা, মাটি আৰু মানুহৰ গান গাই ভাল পোৱা, গানেৰে অগনণ লোকৰ হৃদয় জিনা এজন যাদুকৰ,  ভাগৰৰ বুকুতেই  ভাগৰ জিৰাই ভালপোৱা প্ৰিয় মানুহজনৰ মহাপ্ৰস্থান ঘটিল। অভিশপ্ত ১৯ ছেপ্টেম্বৰত হিয়াৰ আমঠু, আমাৰ মণিকূট,জাতিৰ অমৃত কণ্ঠৰ জুবিনৰ অনকাংক্ষিত বিয়োগে  সমগ্র অসম তথা উত্তৰ পূৰ্বাঞ্চলৰ  অসংখ্য লোকক শোৰ্কাত কৰি তুলিছে। 

       সুৰ গানেৰে জাতিক বিশ্বত গৰ্বিত কৰি, আই অসমীৰ বুকুত বিলীন হল অসমীয়াৰ স্বাভিমান  জাতিৰ মহানায়ক জুবিন গাৰ্গ। লিখি শেষ কৰিব নোৱৰা, এগৰাকী স্বতন্ত্ৰ  ব‍্যক্তিত্বৰ অধিকাৰী জুবিন গাৰ্গ, যি গৰাকী ব‍্যক্তি হৃদয় ভৰি আছিল মানুহৰ প্ৰতি, প্ৰতিটো জীৱৰ প্ৰতি, প্ৰকৃতিৰ প্ৰতি অগাধ ভালপোৱা  এনে এজন অসাধাৰণ ব‍্যক্তিৰ কথা লিখি কৈ শেষ কৰিব নোৱাৰি। ভগৱান সদৃশ প্ৰিয় শিল্পীজনৰ অকাল বিয়োগত  প্ৰতিজন অসমীয়াই আজি হিয়া ঢাকুৰি কান্দিছে, কেৱল কান্দিছে। স্বাভিমানি অসমীয়াৰ  এটা যুগৰ অৱসান ঘটিল। 

     জুবিনদা গোটেই অসম স্তদ্ধ কৰি, অসমীয়াৰ কণ্ঠ ৰুদ্ধ কৰি তুমি কিয় ইমান সোনকালে গুচি গ'লা ???  সুখত,দুখত, আনন্দত, হতাশাত, মৃত্যুত,সফলতা, বেদনাত সকলোবোৰ তোমাৰ গানতেই বিচাৰি পাইছিলোঁ।  তোমাৰ গানৰ জৰিয়তে আমি অনুভৱ কৰিব শিকিছোঁ, ভালপাবলৈ শিকিছোঁ।

       জুবিন দা মানৱদৰদী এই মানুহজনৰ এদিন মৃত্যু হ'ব কেতিয়াও ভবা নাছিলোঁ।  তুমি গুচি যোৱাৰ কথাটো অসমবাসীৰ বাবে অকল্পনীয়, অবিশ্বাস‍্য। জুবিন দা তুমি সদায় অমৰ হৈ ৰবা আমাৰ মাজত। জুবিন গাৰ্গ আমাৰ বাবে এজনেই আছিল আৰু এজনেই চিৰদিন থাকিব। ভগৱানৰ ওচৰত প্ৰাৰ্থনা তুমি পুনৰ জনম লৈ  অসমলৈ আহা আকৌ জুবিনদা হিচাপে তোমাক লগ পাম। জুবিনদা  নিমৰ্ম হত‍্যাৰ  উচিত বিচাৰ হওক আৰু দোষীয়ে অনতিপলমে শাস্তি পাওক।

 তুমি থাকিবা চিৰদিনলৈ আমাৰ হৃদয়ত একেদৰেই, গীততেই বিচাৰি ল'ম, গীততেই কথা পাতিম। তোমাক বিদায় বুলি ক'ব নোৱৰোঁ। 

   "জয় জুবিন দা।''

  ছাঁয়া নাথ।

  হাতীঘূলি, শিলপুখুৰী